अनसनमा रहेका दिक्तेलका मेयर वीर अस्पतालमा भर्ना,स्वास्थ्यको जिम्मा आफैं लिनेभन्दै डिस्चार्ज

सात बुँदे माग राखेर माइतीघर मण्डलामा अनसन सुरू गरेका दिक्तेल रुपाकोट मझुवागडी नगरपालिकाका मेयर तिर्थराज भट्टराई वीर अस्पतालमा भर्ना भएका छन् । स्वास्थ्यमा समस्या देखिएपछि अनशनस्थल माइतीघरबाट उनलाई उपचारका लागि वीर अस्पताल लगिएको हो । उनलाई प्रेसर लो, सुगर लो र चक्कर आउनेजस्ता समस्या देखिएको छ । आफूले अघि सारेको सात बुँदे माग सम्बोधनमा सरकार गम्भीर नदेखिएको भन्दै भट्टराई बुधबारदेखि आमरण अनशनमा बसेका हुन् ।

स्वास्थ्यमा समस्या देखिएपनि उनले स्वास्थ्यको जिम्मा आफैँ लिने कागज गरेका छन् । स्वास्थ्यमा गम्भीर समस्या देखापर्न सक्ने भन्दै उपचारमा संलग्न चिकित्सकले डिस्चार्ज दिन नमानेपछि भट्टराईले आफ्नो स्वास्थ्यको जिम्मा आफैं लिने कागज गरेका हुन् । डिस्चार्ज भएर पुनः माइतीघरमै आमरण अनशन बस्ने उनको तयारी छ ।

बिहान मानवअधिकारकर्मीले भेटेको र अहिले स्वास्थ्यमन्त्री प्रदीप पौडेल वीर अस्पताल जाने तयारी छ । जलवायु परिवर्तनको असरलाई जोगाउन सरकारले ठोस कानून बनाउनु पर्ने, बॉस र अन्य कच्चा पदार्थ सरकारी कार्यालयमा प्रयोग गर्न विल्डिङ कोड र नम्स तयार गरी कानून बनाउनु पर्ने, प्लास्टिकजन्य फोहोर उत्पादन गरी प्रदुषण गर्ने उद्योगीसँग स्थानीय तहले अतिरिक्त कर लिन पाउने कानून बनाउनु पर्ने लगायत माग उनको छ ।