तरबारले केक काटेर आतङ्क मच्चाएको आरोपमा पक्राउ परेका लामा फेरि पक्राउ

काठमाडौँ, गुण्डागर्दीमा संलग्न रेस लामा तरबारले केक काटेर टिकटकमा भिडियो पोस्ट गर्दै आतङ्क मच्चाएको आरोपमा २०८१ माघ २४ मा पक्राउ परेका थिए । आफूलाई रेस लामा भनेर चिनाउने गोपाल मोक्तान ६ महिनापछि फेरि पक्राउ गरेका छन् ।

आइतबार साँझ उनलाई प्रहरी वृत्त गौशालाबाट खटिएको टोलीले चाबहिलस्थित एवान क्याफेबाट पक्राउ गरेको हो । भदौ ४ मा काठमाडौँ महानगरपालिका–९ बत्तिसपुतलीमा सञ्चालित बाजेको सेकुवामाएकराज कार्की ‘जनक’लाई कुटपिट गरेको उनीमाथि आरोप छ ।

जनकलाई रेसले २ लाख ८० हजार तिर्नुपर्ने थियो । तर, सो रकम माग्दा रेसले उल्टै कुटपिट गरेको पीडितको आरोप छ । उनीविरुद्ध जनकले प्रहरीमा जाहेरी दिएका थिए । जाहेरी दर्ता गरेर अभद्र व्यवहारसम्बन्धी कसुरमा अनुसन्धान भइरहेको जिल्ला प्रहरी परिसर काठमाडौँका एसएसपी विश्व अधिकारीले बताए ।

रेस लामा दोलखाको बैतेश्वर गाउँपालिका–३ का स्थानीय हुन् । काठमाडौँको सुकेधारा बस्ने उनी नेपाली कांग्रेसका बागमती प्रदेश सांसद कुन्दनराज काफ्लेनिकट मानिन्छन् । ६ महिनाअघि तरबारले केक काटेर आतङ्क मच्चाएको आरोपमा लामा सहित ७ जना पक्राउ परेका थिए ।

त्यस बेला रोमन मगर, सुमन पराजुली, मनोहर थापा मगर, रोनिस बरामु, रोशन तामाङ र गुन बहादुर गुरुङ पक्राउ परेका थिए । टिकटकमा खुकुरी र तरबारले केक काटेर ‘शोअफ’ गरेको आरोपमा उपत्यका अपराध अनुसन्धान कार्यालयले उनीहरूमाथि अनुसन्धान गरेको थियो ।