काठमाडौँ, कार्तिक २८ मा साँझ भक्तपुरको दरबार स्क्वायरमा ९४ वर्षीया विष्णु कुमारी त्वयना मृत फेला परिन् । आफू बस्ने घरको तेस्रो तलामा उनी मृत अवस्थामा भेटिएकी हुन् ।
हत्या भएको एक महिनासम्म पनि प्रहरीले आरोपीको पहिचान गर्न सकेको छैन । उपत्यका अपराध अनुसन्धान कार्यालय र जिल्ला प्रहरी परिसर भक्तपुरका अनुसन्धान अधिकृतहरूले त्यसबारे अनुसन्धान गरिरहेका छन् ।
घरको दुईतला भाडामा लगाएर त्वयना एक्लै तेस्रो तलामा बस्थिन् । हत्याराले दुवै खुट्टा बाँधेर मुखमा कपडा कोचेर उनको हत्या गरेको प्रहरीको अनुसन्धान निष्कर्ष छ । हत्यापछि कानमा लगाएको ८ आनाको सुनको रिङ र थैलीमा भएको पैसा हत्यामा संलग्नले लुटेर लगेको भेटिएको छ ।
अनुसन्धानमा संलग्न एकजना अधिकृत भन्छन्, ‘थैलीको नगद र सुन लुटेको देखिन्छ । विष्णु कुमारीको हत्यारा खोज्दै प्रहरीले अहिलेसम्म १ सय जनामाथि अनुसन्धान गरिसकेको छ ।
तर, उनीहरूबाट हत्याबारे कुनै पनि क्लु नभेटिएको प्रहरी अधिकृतहरू बताउँछन् । त्वयनाको हत्याबारे अनुसन्धान गर्दा थप ६ वटा पुराना घटना भने सुल्झिएका छन् । हत्या अनुसन्धानको क्रममा पक्राउ परेकाहरूमध्ये ५ वटा पुराना चोरीको घटनामा फरार र एउटा लागुऔषधको घटनामा संलग्न फरार आरोपी पक्राउ परे ।
जिल्ला प्रहरी परिसर भक्तपुरका डीएसपी ढुण्डीराज नेउपाउने भन्छन्, ‘पुराना घटनामा फरार आरोपीहरू सो घटना अनुसन्धानको क्रममा खुलेका छन् ।’ प्रहरीका अनुसार ६ वटा पुरानो घटना सुल्झिएको छ ।
चोर र लुटेरा केन्द्रित अनुसन्धान
घरको दुईतला भाडामा लगाएर त्वयना एक्लै तेस्रो तलामा बस्थिन् । उनका ४ भाइ छोरा र बुहारी सूर्यविनायकमा बस्छन् । भक्तपुर नगरपालिका–३ दरबार स्क्वायरमा उनको अर्को पनि घर छ । दुवै घरको भाडा त्वयनाले नै उठाउँथिन् । आफू बस्ने घरको ६ हजार ५ सय र अर्को घरको २० हजार भाडा आउँथ्यो । उनको वृद्धभत्ता पनि आउँथ्यो ।
दुवै खुट्टा बाँधेर मुखमा कपडा कोचेर उनको हत्या गरेको हुनाले चोरी र लुट्ने व्यक्तिले हत्या गरेको आशङ्का गरिएको छ । प्रहरीले सो घटनाको अनुसन्धान चोर र लुटेरामा केन्द्रित गरेको छ ।
चोरी गर्दै हिँड्नेहरू र लुटेरामा हाम्रो अनुसन्धान केन्द्रित छ’ अनुसन्धानमा संलग्न एकजना अधिकृत भन्छन्, ‘तर, अहिलेसम्म कुनै पनि क्लु भेटिएन । उपत्यका अपराध अनुसन्धान कार्यालयका डीएसपीद्वय रुगम कुँवर र सुवास बुढाथोकीले अनुसन्धानको नेतृत्व गरेका छन् ।
प्रतिक्रिया