सिंहदरबारभित्र कर्मचारी सेयर कारोबारमा व्यस्त, अख्तियारको छड्के अनुसन्धान

काठमाडौं, सिंहदरबारभित्रका कर्मचारी कार्यालय समयमा सेयर कारोबारमा व्यस्त भएपछि सेवामा अवरोध भएको भन्दै केही दिनअघि अख्तियार दुरुपयोग अनुसन्धान आयोगमा एउटा उजुरी परेपछि अख्तियारको टिमले सिंहदरबारमा छड्के अनुसन्धान गरेकाे छ ।

सो क्रममा उजुरीअनुरुप विभिन्न मन्त्रालयका केही कर्मचारीले सेयर कारोबार गर्ने गरेको पाइएकाे र‘कार्यालय समयमै सरकारी स्रोत, साधनलाई व्यक्तिगत प्रयोजनमा खर्चिएको पाइएकाे’ अख्तियार स्रोतले बताएकाे छ ।

‘सिंहदरबारभित्र त्यसरी कारोबार हुँदा सेवामा असर पारेकाले प्रधानमन्त्री कार्यालयलाई सिंहदरबारभित्र कर्मचारीलाई सेयर कारोबारमा निरुत्साहन गर्न भनेर पत्र पठाएका छौं । प्रधानमन्त्री कार्यालयले सो पत्र अध्ययन गर्दै आईटीको टिमसँग हाल छलफल गरिरहेको छ । छलफलपछि सिंहदरबारभित्र सेयर कारोबारलाई निरुत्साहन गर्नेगरी निर्देशन गरिने भएको छ । ‘सरकारी स्रोत, साधनको परिचालन गरी कर्मचारीलाई सेयर कारोबार गर्न रोक लगाउने विषयमा आईटी टीमसँग छलफल भइरहेको छ, यसबारे छिट्टै निर्णय हुन्छ’ स्रोतले भन्यो ।

सिंहदरबार मात्रै नभई मुख्यतः काठमाडौंका कयौं सरकारी कार्यालयहरुमा कार्यालय समयमा सेयर कारोबार हुने गरेको छ । कर्मचारी सेयर कारोबारमा व्यस्त हुँदा सार्वजनिक सेवामा असर पर्ने मात्रै नभई सरकारी स्रोत साधन समेत व्यक्तिगत प्रयोजनमा दुरुपयोग हुने गरेको स्रोतकाे भनाइ रहेकाे छ ।