काठमाडौं, मलेसियामा जारी आइसिसी यु–१९ महिला टी–ट्वान्टी विश्वकप क्रिकेट प्रतियोगिताअन्तर्गत आज भएको खेलमा नेपाल स्कटल्याण्डसँग एक विकेटले पराजित भएको छ। मलेसियाको युकेएम ओभल क्रिकेट मैदानमा सम्पन्न खेलमा नेपालले प्रस्तुत गरेको ७४ रनको लक्ष्य स्कटल्याण्डले १८ दशमलव चार ओभरमा नौ विकेटको क्षतिमा पूरा गर्यो।
स्कटल्यान्डका लागि पिपा स्प्रोलले ४७ बलमा तीन चौकाको सहयोगमा ३५ रन बनाइन्। त्यसैगरी, ग्याब्रियला फोन्टेन्लाले १२ रन जोडिन्। बलिङतर्फ नेपालकी सिमना केसी र रचना चौधरीले समान दुई(दुई विकेट लिए भने कप्तान पूजा महतो र कृष्मा गुरुङले समान एकरएक विकेट लिए।
त्यसअघि टस जितेर पहिला ब्याटिङ गरेको नेपालले १८ दशमलव पाँच ओभरमा सबै विकेट गुमाउँदै ७३ रन मात्रै बनाउन सक्यो। नेपालका लागि कप्तान पूजा महतोले ४३ बलमा तीन चौकाको सहयोगमा २७ रन जोडिन्।
त्यसैगरी सावित्री धामीले १० रन जोड्नुबाहेक अन्य ब्याटरले दोहोरो अंकमा रन जोड्न सकेनन्। स्कटल्याण्डका लागि मैसी म्याकिरा एक्लैले पाँच विकेट लिइन् भने अमी बलडाइ र नइमा शेखले समान दुईरदुई विकेट लिए। त्यस्तै, क्रिस्टी म्यायाकोलले एक विकेट झारिन्।
प्रतियोगितामा नेपालको यो लगातार दोस्रो हार हो। यसअघि भएको पहिलो खेलमा नेपाल बंगलादेशसँग पराजित भएको थियो। जितसँगै स्कटल्याण्डले सुपर सिक्समा पुग्ने सम्भावनालाई बलियो बनाएको छ । स्कटल्याण्ड पहिलो खेलमा अष्ट्रेलियासँग पराजित भएको थियो।
प्रतिक्रिया