तीन महिनादेखि नेतृत्वविहीन केयू, नयाँ उपकुलपति कहिले ?

नियुक्तिको ढिलाइले काम प्रभावित

उपकुलपति नहुँदा विश्वविद्यालयले महत्त्वपूर्ण निर्णय लिन सकेको छैन । तत्कालीन उपकुलपति अच्युत वाग्ले अध्यादेशबाट पदमुक्त भएपछि परीक्षा नियन्त्रक रहेका ऋषिकेश वाग्लेलाई उपकुलपतिको जिम्मेवारी दिइएको छ ।

नयाँ उपकुलपति आएपछि नयाँ कामको योजना बनाउन महत्त्वपूर्ण निर्णय केयूले नगरेको हो । ‘काम गर्न नमिल्ने भन्ने होइन । तर चार वर्षको लागि नयाँ उपकुलपति आउने भएकाले अन्य योजना नबनाएको हो । दैनिक काम गरिरहेका छौँ,’ निमित्त उपकुलपति वाग्लेले भने, ‘काम रोकिएको छैन । नयाँ काम पनि गरेको छैन ।’

अब आउने उपकुलपतिले आफ्नो योजनाअनुसार गर्ने भएकाले अहिले नयाँ योजनामा काम नगरिएको वाग्लेले बताए । ‘चार वर्षको भएको भए योजना बनाएर काम गर्न हुन्थ्यो । तर नयाँ नेतृत्व आएपछि काममा असर नपरोस्, उहाँको योजनाअनुसार काम होस् भनेर हो,’ उनले भने ।

हाल केयूका डिनहरू पनि निमित्त छन् । नयाँ नियुक्ति भएको छैन । नयाँ उपकुलपति आएपछि नै नियुक्ति गर्ने तयारी छ । ‘डिनहरूको नियुक्ति गरेको छैन,’ वाग्लेले भने ।

शिक्षक र कर्मचारीको आन्तरिक र बाह्य बढुवा रोकिएको छ । करिब १५ जना शिक्षक र ८० जना कर्मचारीको बढुवा रोकिएको छ । लिखित र अन्तर्वार्ता सकिएर पनि उपकुलपति नभएका कारण निर्णय नभएको हो ।

‘नयाँ उपकुलपति नआएसम्म दीर्घकालमा असर पर्ने निर्णय नगर्ने भन्ने छ,’ स्कुल अफ आर्ट्सका डिन उद्धव प्याकुरेले भने ।

केयूले अघिल्लो वर्ष १८ प्रतिशत विद्यार्थी वृद्धि गरेको थियो । यो वर्ष ३० प्रतिशत वृद्धि गर्ने योजना थियो तर उपकुलपति नहुँदा प्रभावित भएको छ । ‘संरचना तयारी गर्नुपर्ने थियो । तयारी नभएका कारण विद्यार्थी वृद्धि गर्ने लक्ष्य प्रभावित भएको छ,’ प्याकुरेलले भने ।

केयूमा हाल भर्नाको प्रक्रिया चलेको छ । प्रत्येक वर्ष १० प्रतिशत शुल्क बढाउने भन्ने छ । तर पदाधिकारी नभएका कारण निर्णय नै हुन नसकेको प्राध्यापकहरू बताउँछन् ।

विज्ञान र इन्जिनियरिङमा २० वटा कक्षा र ल्याब अपुग छ । नयाँ उपकुलपति आएपछि ठेक्कामा दिने भनिएकाले प्रक्रिया अगाडि बढेको छैन । कक्षा कोठाको व्यवस्थापन नभएका कारण विद्यार्थीलाई कहाँ राखेर पढाउने भन्ने अन्योल केयूमा छ ।

शिक्षक र कर्मचारीले बढेको तलब पाएका छैनन् । सरकारले विद्यार्थीको नतिजा ४५ दिनमा सार्वजनिक गर्न भनेको छ । तर सरकारले ९० दिनभन्दा बढी समय हुँदा पनि एउटा उपकुलपति दिन नसकेको टिप्पणी शिक्षक कर्मचारीको छ ।

‘विद्यार्थीको नतिजा ४५ दिनमा सार्वजनिक गर्नु राम्रो हो । तर ९० दिन बढी भयो केयूले नेतृत्व पाएको छैन,’ केयू प्राध्यापक संघका अध्यक्ष डा. विकास अधिकारीले भने, ‘सरकारले ९० दिनसम्म पनि किन उपकुलपति दिन नसकेको हो ? नेतृत्व नहुँदा केयूमा असर परेको छ । छिटो नियुक्ति गर्न अनुरोध गर्दछौं ।’

एक साताभित्र उपकुलपतिको नियुक्ति

शिक्षा मन्त्रालयका अधिकारीका अनुसार अबको एक साताभित्र केयूले नयाँ उपकुलपति पाउने छ । गत शुक्रबार नै १० जनाको सूचि सार्वजनिक गर्ने तयारी भए पनि सुनसरी र मधेश प्रदेशमा भएको घटनाले रोकिएको थियो ।

सोमबार सूचि सार्वजनिक गरेपछि एक साताभित्र नै उपकुलपति नियुक्ति गर्ने तयारी समितिको छ । ‘कुलपतिलाई छिट्टै नाम सिफारिस गर्छौं । त्यसपछि नियुक्ति हुन्छ,’ समितिका सदस्य शर्माले भने ।