मितेरी सहकारी ठगी मुद्दामा बयान सकिएपछि थुन छेक बहस सुरु हुँदै

काठमाडौँ, ललितपुरको मितेरी सहकारी ठगी मुद्दामा प्रतिवादी बनाइएका कुम्भराज गुरुङ अदालतमा उपस्थित भएर बयान सकिएपछि थुनछेक बहस सुरु हुँदै छ । ललितपुर जिल्ला अदालतका न्यायाधीश निर्मला योङयाको इजलासमा बयान सुरु हुन लागेको हो । अदालतमा उपस्थित भएका गुरुङको बयान सकिएपछि थुनछेक बहस हुन लागेको हो । थुनछेक बहस सकिएपछि अदालतले थुनामा पठाउन सक्ने या धरौटी लिएर छाड्न आदेश दिन सक्नेछ ।

यसअघि न्यायाधीश योङयाकै इजलासले तीन अभियुक्त मध्ये दुई जनालाई थुनामा पठाउन र एक जनालाई धरौटीमा छाड्ने आदेश दिएको थियो । अदालतले सुरेश अधिकारीलाई ७ लाख धरौटीमा छाडने आदेश गरेको छ भने ज्योतिबहादुर भण्डारी र सुवास खत्रीलाई पुर्पक्षका लागि थुनामा पठाउने आदेश गरेको थियो ।

सहकारी ठगी मुद्दामा ८ जना प्रतिवादी बनाइएकोमा प्रहरीले ३ जना मात्र पक्रेर अदालतमा पेस गरेको थियो । नेपाली कांग्रेसका उपसभापति धनराज गुरुङको पूर्वपत्नी ज्योति गुरुङसहित ४ जना फरार छन् ।

ललितपुरमा कार्यालय रहेको मितेरी सहकारीका अध्यक्ष कुम्भराज गुरुङ, महाप्रबन्धक ज्योति गुरुङ र पक्राउ परेका ३ जना सहित ८ जनालाई प्रतिवादी कायम गरेर मुद्दा दायर गरिएको थियो । सहकारीको रकम अपचलनमा प्रहरीले ज्योति गुरुङ र भण्डारीसँग १७ करोड बिगो मागदाबी लिइएको थियो ।

ज्योति बहादुर भण्डारीसँग ‘कनेक्सन’ देखिएका सुरेश अधिकारी र सुवास खत्रीलाई प्रहरीले राष्ट्र बैङ्क ऐन र हुण्डी सम्बन्धी कसुरमा थप १३ करोड बिगो मागदाबी गरिएको थियो ।
धेरैजसो थाइल्यान्ड र कम्बोडियामा बस्ने भण्डारीले ललितपुर महानगरपालिका वडा नम्बर–५ स्थित महालक्ष्मीस्थानमा सञ्चालित मितेरी बचतको रकम मात्रै ठगेनन् ।

‘आकर्षक व्याज’को लोभ देखाएर सहकारीका अध्यक्ष कुम्भराज गुरुङ र महाप्रबन्धक ज्योति गुरुङसँग व्यक्तिगत रूपमा करोडौं ठगेको केन्द्रीय अनुसन्धान ब्युरो ९सीआईबी०को अनुसन्धान निष्कर्ष छ । मितेरीको सावाँ ब्याज सहित १४ करोड र सहकारीका पदाधिकारीबाट थप रकम समेत गरेर उनले २२ करोड रुपैयाँ ठगेको भेटिएको थियो ।